04 Jan

القيل والقال.pdf


 القيل والقال


سلّط   على  اللي   همّه   القيل   والقال

          علمٍ    يروّح     به    وعلمٍ    يجي    به

يفرح   إلى  من سَمْع   ما يزعج  البال

          ويسير   به   بين   العباد    ايْحَكي   به

كنْه  على   نقْل   الحكي   كاسبٍ   مال

          يسْتَرّ  لا  أبعد   عن   صحيبٍ   صحيبه

جعْله  فدا  اللي  هرجهم   زين   الامثال

          أهْل      العلوم      الطيّبات     العجيبه

اللي     سوالفهم    طمع    كل    رجّال

          تملا     كيان    أهل    العقول    اللبيبه

شعر .. وقصص .. وعلوم فرسان وأبطال

          يفرح     بها    الطيب    ويزداد    طيبه

ويسمر   بها   السامر  على  ريح فنجال

          وان   ردّها   لاهْل    الوفا    ما    تعيبه

يا  الله  لا   تذري   ذرى   كلّ    الانذال

          المفسدين     أهل     القلوب     العطيبه

ويا  الله   لا   تمحق   على  طيبٍ   حال

          والا   الردي   لا   تنقذه   من    مصيبه

لنّ   الردي   لعْروض    الاجواد    ختّال

          لو   ما   سمع    ولّف    هروجٍ    غريبه

هذا   وله    في   نفسه   ألوان وأشكال

          متْكبّرٍ      عقله         بعيدٍ        قريبه

وقت    السّعه    راعي    مروّه    وخيّال

          بالحكي     بلْحاله      بينطّح      كتيبه

وانْ    جا    نهارٍ   فيه   للشر     زلزال

          عزّي    لحال      مْهبّلٍ      تلتجي    به

الطيب   يظهر   في    المواقف  والافعال

          ما    هو    بهرجة   خاملٍ   ما  درِي به

والمدح   يبغي    جهد    ومْزاحم   رْجال

          وكلٍّ   على   ما   قيل    ياخذ    نصيبه

تعليقات
* لن يتم نشر هذا البريد الإلكتروني على الموقع.