غوايات
متى ينتهي قلبي من الهم والهوجاس
وتصبح مثل غيري حياتي طبيعية
أحاول وازاول واختبي من عيون الناس
وأكافح غوايات الحياة الجنونية
على شان ما أحدن يدري بوضعي الحساس
وتبدا حروب الظن والنية السية
شياطين عصر ( الله يديمك ) و ( فوق الرأس )
تولوا على أحلام النفوس العصامية
يقولون : فرق الناس في الدين ما له ساس
والأديان في عصر الحضارة سواسية
وأنا ما عرف وش مطلب الناس في تكساس
لكني بخيصٍ بالشعوب الخليجية
ولا ادري عن السيسي ولا همني عباس
أهل غزة ادرى وأزمة النيل مصرية
ليا لاح برق وجاب علم الحيا العساس
رفعت الكفوف وقلت يا مصلح النية
تكف الهموم الكايدات وتزيل الباس
وتجعل بفضلك دار الاسلام محمية
ولولا القلم واللي يخطه على القرطاس
تعرضت مثل الناس لازمات نفسية
عسى الله يجعل لامة مُحَمَّدٍ حراس
من الشرك ... واللي يدعمونه علانية
مبارك بن شافي الهاجري