في رثاء
ابن العم الأخ الصديق
سالم بن عوض الخضير
رحمه الله و غفر له
يا عاذلي لا شفت دمعي هماليل
ما اعْذَرْك لي لو تعلم اللي جرى لي
فقدت ركنٍ من ركون الرجاجيل
درعٍ لمن صكّت عليه الليالي
فزعة رفيقه لا هَزَع متنه الشيل
و انحلّ عقد مروبعات الحبالي
يا وجد حالي عقب فرقاه بالحيل
أنا أشهد إنّ الحزن ولّى بحالي
في نشرة الاخبار موجز و تفصيل
جاني نباه و قلت : وا عزتالي
و سبّحت تسبيحٍ و هلّلت تهليل
و قمت اصفق بكف اليمين الشمالي
ما عاد بي قوّه و لا عاد بي حيل
ما غير أهلّ الدمع و أندب لحالي
أبكي على ذرب النبا نافل الجيل
سالم .. و يا حزناه لا من طرى لي
يطري على عاد الليالي مقابيل
تاريخ ودٍّ سطّرته المعالي
تاريخ زحلٍ في المهمات حلحيل
ما كنّه إلا الشامخ من الجبالي
يظلّ ظلّه من دهته الغرابيل
من نايد العربان و الا موالي
قوله لمن جاه :( ابشروا بالتساهيل )
عقب الشحم و مزعفرات الدلالي
ابو محمد في العرب كنّه سهيل
نجمٍ تقدّى به زحول الرجالي
عساه في خضر الجنان المظاليل
جارٍ لطٰه في الرفوف العوالي
مبارك بن شافي الهاجري