تبسّم
تبسم وامسح دموعك عسى يفداك من بكّاك
ترى شوف الدموع اللي على خدّك يبكيني
عَطِ الفجر الندي فوح العبير اللي يمسّ شْفاك
وخلِّ الطير يسرق ضحكتك صوب البساتيني
ترفّق يا مسافر في مودٍّ تجرحه فرقاك
يورّيك الفرح والنار تقدح بين ضلعيني
أبيك ان رحت تترك لي بقايا بسمتك ورْضاك
أعيش بْها ليالي وحدتي لا غبت عن عيني
أنا مجنونك اللي عشت طول العمر في رجواك
صنعتك في خيالي قبل أشوفك يا معنّيني
ويوم انّي لقيتك عشت لذات الهوى ويّاك
طردت بوصلك أشباح العذاب وطابت سْنيني
خذ أيامي خذ أحلامي خذ فْوادٍ عجز ينساك
وعطني ضحكتك .. والا دخيلك لا تخلّيني