23 Dec

خمسين.pdf


خمسين


بين    القلم    والكتاب    وريح     فنجالي

          رسمت    حلم    الحياة    وخطّة    سنيني

وصلت   سطح   القمر    بمناي    وآمالي

          وأهديت    زهر   النجوم   النور   بيديني

أفرح     ليا     غنّوا     العشاق     موالي

          واحزن     ليا   ضيّعوا    باقي   عناويني

واخاوي   الشعر   في   حلّي     وترحالي

          على    جناح     الخيال     اللي    يعلّيني

وانظر    لجرحٍ    هناك     مكدّر     بالي

          طابت   جروحي   وهو   ما زال  مشقيني

مثل  الجبل   ما  تزعزع   راسي   العالي

          لو   انّ   في    داخلي    تطبخ    براكيني

ترمي     شظايا    المروّه    بين    عذّالي

          اللي    ذبحهم    نجاحي     في    مياديني

هم يحسبون  ان   قصيدي   يغلب   أفعالي

          وانا    موازين   شعري    من    موازيني

أدوّر     الطيب     وابذل   ما   تهيّا   لي

          ولا  ابغي   احدن  على  طيبي   يجازيني

ما    ازكّي    النفس   ربّي   ساترٍ   حالي

          اقديت    واخطيت   يا   الله   لا   تحافيني

وش عذري إليا جنحت   وشانت   اعمالي

          والطيب من مثل الدّما  اللي  في  شراييني

لا صار   ورث   العباد   أطيان  وأموالي

          ورث    المروّه    من    أسلافي    يكفّيني

خمسين عام انقضت ما  ادري  عن  التالي

          كني     بحلمي     يرفرف     بالجناحيني

أسير     والذكريات    البيض    تبرى لي

          يميتني    بعضها      والبعض     يحييني

واللي   من   اوّل   بعيني   مطلبٍ   غالي

          هالحين   ما   عاد    يشبعني     ويرويني

خمسين   راحت   حساب   أيام     ولْيالي

          يا  الله   لا   تجعل   الخسران   في   ديني

تعبت    والشيب    غيّر    باقي    أحوالي

          واطفا   لهيب    الطموح    اللي    يغذّيني

لولا   رجا   العفو   من  ربّ السما العالي

          رميت   الاحلام   عند   اعتاب   خمسيني

تعليقات
* لن يتم نشر هذا البريد الإلكتروني على الموقع.