صباح الأحمد.pdf
صباح الأحمد الصباح
لبّسوها ثوب عزٍ يناسبها
وانثروا ورد الغلا بين أياديها
ليتها تدري بصبٍّ يهيم ابْها
عاشقٍ بالروح والدم يفديها
سار في الأرض العريضه وداج ابْها
ما لقا فيها حليٍّ يحاليها
جنةٍ ما كلّ طامع يفوز ابْها
من اعْداها ربّ الارباب حاميها
دونها الانذال تقصر شواربها
ما يفوز بوصلها غير أهاليها
من قديم الوقت ما احدن يقاربها
ينعثر من دونها من طمع فيها
سامعي صدّق علومي وكذّبها
ما خلِق مثل الكويت وضواحيها
ديرة رجالٍ كرامٍ مناسبها
الصباح حصونها من معاديها
أسرةٍ من روس تغلب مناجبها
ما انقطع من يوم ذي قار طاريها
دارهم يلقى الامان الغريب ابْها
لين ينسى داره اللي ربى فيها
يا مغنّي عذب الابيات هذّبها
خلّ غيرك لا سمعها يغنّيها
واختر من اجزل فنونك ورتّبها
واخلط السحر الحلال بْمعانيها
وامدح شيوخٍ كبارٍ مراتبها
فعلها بين البرايا معلّيها
عاش شيخٍ كلّ الامداح كاسبها
شاهده حاضر حياته وماضيها
السياسه حاطها من جوانبها
من مباديه استمدت مباديها
أبلجٍ داره تعلى مراتبها
لين خلّى النجم الازهر يخاويها
شيخ الانسانية وراس مذهبها
وقفته للخير ما احدن بناسيها
بلسم جروح الشعوب ومتاعبها
لا لعب بجروحها من يداويها
يوم شاف الشام كَبْرَت مصايبها
واستباح الحقد الاسود نواحيها
وانشبت فيها المنايا مخالبها
قام يرميها للاحزان راميها
مدّ يمنىً ما تعدد مناقبها
عن ضعوف الناس يدفع بلاويها
والجزيره يوم شطّت مراكبها
وابعدت الامواج عنها مراسيها
قام يدفعها التخالف ويجذبها
ذاك يبعدها وهذاك يدنيها
فزّ فزّة مخلصٍ حلّ واجبها
للمشاكل بين الاقراب ينهيها
خِطّ بحروف الذهب يا مذهّبها
سيرةٍ تملا فضا وعي قاريها
سيرة الامجاد وافعال صاحبها
سيّدي حرز المروة وراعيها
واندب التاريخ ينشر عجايبها
في مسيره بين الاجيال يرويها
عن صباح الاحمد وداره اكتبها
الكويت اللي بالارواح نفديها