يا شين عذلك
يا شين عذلك يا الرفيق الموالي
لمني بحال وجنّب اللّوم في حال
ماني بمجهولٍ قصارٍ حبالي
في الثوب مهما قلت علمٍ ورجّال
أغليت أنا نفسي على كلّ غالي
وحدّيتها غصبٍ على المنزل العال
ما سرت في سيرة كثير الهبالي
اللي يظنّ المرجله لعب جهّال
خبلٍ يصاحب خازنين الريالي
لو كان ما له عندهم قرش وريال
ضحّاك في المجلس هذورٍ يلالي
يفرح بقولة قال هذا وذا قال
لَعَلّ ما لمضيع العلم تالي
نجس الفواد محارب العمّ والخال
هذا مجاله ما يناسب مجالي
البعد عنْه آخير في كلّ الاحوال
وانا أحمد المولى عزيز الجلالي
اللي جعل ربعي مشاكيل ورْجال
أفخر بهم لا كلّحنّ الليالي
ويزودني زود ابن عمّي وما نال
ماني باغطّ العلم عند السوالي
هدم البخوت من الحسد طبع الانذال
يا عارفين أحوال قلبي وحالي
قلبي ربيعه شوف ذربين الافعال
آحبّ خوّة طيّبين الرجالي
اللي قبال وجيههم يشرح البال
وآصدّ عمّن لا يسرّه قبالي
اللي يفاولني بشينات الاقوال
عنّه مناهيجي عراضٍ طوالي
لو كان ما عن قرب جدّه تنصّال
لو عشت في الدنيا وحيدٍ لحالي
آخير من قربي خبيثين الاعمال
هذا وانا ماني بهيسٍ ثعالي
ورثت من شيباني علوم وامثال
والمجد بيتٍ شامخ البني عالي
من لا يجدّد بنْيته عوّد أطلال
يا الله يا ربّي عليك اتكالي
وانت الوحيد اللي عليك التّوكّال
انّك تساعدني على ما طرالي
وتفكّ لي باب السعد والتسهّال